شعر رومانسي عراقي

موعد حب

هو / اشلونچ يا أعز

الناس عندي ..

هو الگلب چم أحبيبه عنده ..

هي / هزني الشوگ

عالموعد اتانيك ..

وأعد بيدي الدقايق

وحده وحده ..

وحده .. اثنين ..

هاي الثالثة تروح ..

اتاني وصار هالموعد اشبعده

نمت حسبالي

اشوفك بالحلم جاي ..

وگلت دمعاتي احطهن وسط خده

هو / نمتي .. هنيالچ غفيتي ..

وآنة ليلي يمر على

عيوني صبح

الينيَّم وردة ويمسد عليها..

مو مثل ليلولي وينيم جرح .. !!

والغفه ابكلمة محنه ..

مو مثل الينام وبعينه ملح ..!!

هي / لا حبيبي ..

آنه هذا الليل من يمرني دمعة..

وحزن.. واشواگ .. وحنين

آنه عيني عليك ما بطل دمعها ..

تبچي ما تسكت العين ..

هو / لا .. لا تبچين ..

امسحي دمعتچ

وارجوچ لا تبچين ..

يل دمعچ جمر

وخدودچ احلى أورود .. على اخدودچ من دموع العين ..

لا تبچين ..

وردة وتحترك ما تحمل النيران ..

يذبل كل ورگها وتستحي من الطين ..

هي / وانت تگلي لا تبچين ..؟

مو عمري انتهى .. وايامي كلها أتروح ..

لو راح العمر متگلي اجيبه أمنين ..؟

هو / لا تبچين ..

المن بعد المن تسوه دمعه أتطيح ..

هو اشباقي بينا

ونحترگ كل حين ..

تعبنا القهر ممشى جزيرة وخوف ..

صار الماضي غلطه وچنه غلطانين !!

لا تبچين لو يسوه العمر يمكن بچينا اسنين ..

هي / اشلون اتگلي لاتبچين ..

هو / لا تبچين ..!!

هي / تدري انت اليحب

ما يگدر اعله النار ..

ويا نار اللي بيَّه أتفزز الميتين ..

احتاج الدمع من ما اشوفك يوم ..

لأن يصبح عليَّ اليوم خمس سنين ..!! حبيبي لخاطري ..

لا تبتعد ارجوك

ما احمل فراگك ..

تدري كلش زين ..

هو / بس ارجوچ لاتبچين ..

خوفي آنه عليچ من الدمع والله ..

مرات الدمع

ياخذ حلاة العين ..

ويل كلچ ترافه ارجوچ لا تبچين

شعر اخر رومانسي عراقي

الدهر صاير چاي والدنيا قوري ... ليش اليحب يا هواي ينضرب بوري

لمن اشوف هواي يخدر شعوري ....... خدرت بالفانوس حسبالي قوري

شوفو زماني شلون من يأذي ياذي ..... خلاني شجرة موز بين الشواذي

وين البخت يفلان وتكلي مبخوت ... صرت اشتغل دفان محد رضى يموت

زين البخت وياك واصل لهل حد ... احفر كبر للمات كالو عدل رد

كَالوا بعد سنتين ونوزع بيوت .... تاليها حتى المات ما عنده تابوت

فيتر صرت يا ناس والعيشه كشره... وين اليضب الروح بسبانه عشرة

دورلي فيتر زين من روحي مليت لا بدي لا رنكات بس شاصي ظليت

من كثر ما مشتاك خبلت نفسي... اشرب نفط بالكوب حسبالي ببسي

من كثر مامشتاق وحبك بنفسي ... وكفت الامريكان حسبالي تكسي

احول حبيب الروح اثول مطفي لاكاني عين بعين باس الي بصفي

اطبخ وافكر بيك يا حلو العيون بالمركة اخبط جاي حسبالي معجون

ليش الرساله وياي عندك خسارة ماظن خمس سنتات يبنن عمارة

عود انة مثل الناس هم عندي بطة....... راحت تغط بالماي والغطة غطة

فرفح جهازي عليك ثق هلهل الرام.... والشحن من دكيت يركص هجع كام

بطل وربع جريت كل قصدي انساك تاليهه بأخر بيك بالمزه الكاك

هجم بيت العين هلكد وكيحه كلما يمر حليو تكلي صيحه

لو تحط مو مكياج لو تحط حمرة ... العوبة عوبة اتظل والكَمرة كَمرة

يكفي حبيب الروح يكفي بواري... أسست نص بغداد مي ومجاري

تدري اشوكت هلروح من حبك اتوب ؟؟ من تسمع الشيطان غفروله الذنوب

ما يهز گلبه الشوگ ! شوما يجيني ؟ ... يمكن طلع بذات لو گلبه صيني

متعجبة النسوان تطلگ فرد يوم ... طلوگي بالساعات كل ساعة اذب توم

متعجبة النسوان تجيها سستر .. والدكتور والفراشة تفتر

رش الدرب تيزاب حافي أجيلك ... لك شلي بالرجلينالماتجيلك